មនុស្ស២ជំពូក ដែលត្រូវគេជ្រើសរើស និងមនុស្សដែលត្រូវជ្រើសរើសគេ

ជាទូទៅនៅទីណា ក៏ដូចទីណាដែរប្រភេទមនុស្សជាអ្នកជ្រើសរើសគេមកធ្វើការដូចជាចៅហ្វាយ ឬអ្នកគ្រប់គ្រង និងអ្នកក្រោមបង្គាប់ ឬបុគ្លិកបម្រើការ​ងារនៅតាមបណ្តាក្រុមហ៊ុនឯកជន តែងតែត្រូវបានគេចែកចេញជា២ជំពូក។ នៅទីនេះ យើងសូមលើកយក ជំពូកអ្នកគ្រប់គ្រង ឬចៅហ្វាយនាយមក​អធិប្បាយ ដើម្បីគ្រាន់ជាពិចារណាខ្លះៗ។ អ្នកគ្រប់គ្រង ឬចៅហ្វាយនាយ​ខ្លះ កម្រ នឹងមើលឃើញពីគុណសម្បត្តិ អ្នក ក្រោមបង្គាប់ណាស់។ គែគាត់ មិនងាយដំឡើងប្រាក់ខែ ឬប្រាក់ឈ្នួលប្រចាំថ្ងៃឲ្យបុគ្គលិករបស់គាតត់ទេ។ គាត់តែងតែ រង់ចាំមើលជាមុន​សិនថា តើបុគ្គលិកម្នាក់នេះ ឬម្នាក់ណានោះ មានការខិតខំ ឬប្រឹងប្រែងធ្វើការទេ ។

ប្រសិនបើអ្នកក្រោមបង្គាប់ ខិតខំធ្វើការ​ដោយមិនចាំបាច់មានការដាស់តឿននោះ ឬទាល់តែមានការតវ៉ា សុំឲ្យដំឡើងប្រាក់ឈ្នួល ឬកាសុំលាឈប់ពីអ្នក​ក្រោមបង្គាប់ ទើបគាត់សម្រេចចិត្ត​ដំឡើងប្រាក់ខែ ឬប្រាក់ឈ្នួលឲ្យ។ ចៅហ្វាយ​នាយ ឬអ្នកគ្រប់គ្រងមួយជំពូកទៀត គាត់មិនសូវគិតប៉ុន្មានទេ ទោះអ្នក​នោះខិតខំធ្វើការ ដោយយកចិត្តទុកដាក់ ឬមិនយកចិត្តទុកដាក់ក្តី ក៏គាត់នៅតែលើកទឹកចិត្តបុគ្គលិកនោះ ឲ្យខិតខំធ្វើការតាមរយៈការដំ​ឡើងប្រាក់​​ឈ្នួលជាមុន។ ប៉ុន្តែ នៅពេលដែល​គាត់ដំឡើងប្រាក់ឈ្នួលរួចហើយ បុគ្គលនោះ នៅតែ មិនខិតខំធ្វើការ​បម្រើ​អង្គភាពទៀត នៅគាត់នឹងមាន​វិធាន​ការថ្មី ដោយការព្រមានដកប្រាក់ខែវិញ ឬបណ្តេញចេញពីការងារតែម្តង។ ដូច្នេះ ក្នុងនាមអ្នកជាមនុស្ស ដែលត្រូវបានគេជ្រើសរើស ឬជាអ្នកជ្រើស​រើសគេ តើអ្នកគួរតែធ្វើជាមនុស្សជំពូកណា?។

មួយវិញទៀត ចំពោះមនុស្ស ដែលត្រូវគេជ្រើសរើស ឬជាអ្នកធ្វើការឲ្យគេក៏មានពីរជំពូកដូចគ្នាដែរ។ បុគ្គលខ្លះ មិនព្រមខិតខំធ្វើការទេ ដោយរង់ចាំការ​ដំឡើងប្រាក់ខែ ឬប្រាក់ឈ្នួលជាមុន ទើបខិតខំធ្វើការ ឬបើមិនដូច្នបេះទេ គេនឹងធ្វើការតវ៉ា ដើម្បីគំរាមឈប់ពីការងារដោយខ្លួន ដើម្បីទទួលបានការ​ដំឡើងប្រាក់ខែខ្ពស់។ ប៉ុន្តែ មានបុគ្គលខ្លះ មិនដូច្នេះទេ។ គាត់មិនចាំបាច់រង់​ចាំ រហូតដល់មានការដំឡើងប្រាក់ជាមុន ទើបខំធ្វើការឡើយ។ ផ្ទុយទៅវិញ គេបែរជាខិតខំធ្វើការ ដោយមិនខ្វល់អ្វីទំាងអស់ ទោះបីគ្មានការកោតសរសើរ ឬលើកទឹកចិត្តពីមេដឹកនាំឡើយ។ បន្ទាប់ មកនៅពេលចៅហ្វាយ ឬអ្នកគ្រប់គ្រងមើលឃើញពីការងាររបស់គេ ចៅហ្វាយនាយរបស់គេ ក៏ដំឡើងប្រាក់ឈ្នួល ឬប្រាក់ខែទៅតាមអ្វី ដែលគេបានខិតខំ។

ដូច្នេះ ក្នុងនាមអ្នកជាមនុស្ស ដែលត្រូវបានគេជ្រើសរើស ឬជាអ្នកជ្រើសរើសគេមកធ្វើការ តើអ្នកគួរគិត ឬធ្វើរបៀបណា???។