ត្រឹមតែរយៈពេលបីថ្ងៃនៃការឡើងកម្ដៅប្រទេសនៅប៉ាគីស្ថាន មានមនុស្សយ៉ាងហោចណាស់ជិត៧០០នាក់ត្រូវបានបាត់បង់ជីវិត ព្រោះតែមិនអាចទ្រាំទ្រនឹងការឡើងកម្ដៅខ្លាំង ។ មានទីតាំងនៅភាគខាងត្បូងខេត្ត Sindh ខេត្តនេះត្រូវបានអាជ្ញាធរដាក់នៅក្រោមបន្ទាប់អាសន្នភា្លមៗខណៈដែលអាកាសធាតុនៅតែបន្តក្ដៅមិនទាន់បាត់ ។ យ៉ាងណាក៏ដោយមេដឹកនាំរដ្ឋាភិបាលប៉ាគីស្ថានក៏បានជម្រុញអាជ្ញាធរគ្រប់លំដាប់ថ្នាក់ឲ្យមានការរូតរះ ដុសដៃដុសជើងឲ្យបានឆាប់រហ័ស ក្នុងការចូលទៅជួយសង្គ្រោះប្រជាជនរងគ្រោះអស់ទាំងនោះ ។
រាប់មកដល់ថ្ងៃនេះ ការឡើងកម្ដៅនៅប្រទេសប៉ាគីស្ថានបានឆក់យកជីវិតមនុស្សអស់ចំនួន៦៩២នាក់ហើយ បើតាមការឲ្យដឹងរបស់ប្រធានមន្ទីរសុខាភិបាលខេត្តSindh ។ លោកក៏បានបន្តថា បើតាមការប៉ាន់ប្រមាណចំនួនអ្នកស្លាប់ក្នុងគ្រោះកំណាចនេះអាចនឹងមានការកើនឡើង ហើយភាគច្រើនជនរងគ្រោះទាំងនោះសុទ្ធតែស្លាប់នៅក្នុងមន្ទីរពេទ្យទាំងអស់ ។
យោងតាមសេចក្ដីរាយការណ៍របស់សារពត៌មានAFP បានប្រាប់ថា រាប់ចាប់តាំងពីថ្ងៃអង្គារមកសីតុណ្ហភាពនៅក្នុងខេត្តSindhនេះ នៅតែរក្សាកម្ដៅថេរជានិច្ច គឺក្ដៅក្នុងកម្រិត៤៤.៥oC ឯណោះ ។ សម្រាប់ហេតុការណ៍ដ៏អាក្រក់ក្នុងរយៈពេលថ្មីៗនេះ ប្រទេសប៉ាគីស្ថានបានក្លាយជាប្រទេសទីពីរហើយដែលទទួលរងគ្រោះដោយសារការឡើងកម្ដៅនេះ ព្រោះកាលពីខែឧសភាកន្លងទៅ នៅប្រទេសឥណ្ឌា ការឡើងកម្ដៅបានឆក់យកជីវិតមនុស្សអស់ជាង២០០០នាក់ឯណោះ ។
គេសង្កេតឃើញថា ក្នុងឆ្នាំ២០១៥នេះការឡើងកម្ដៅក្នុងពិភពលោក ពិតជានាំមកនូវមហន្តរាយដល់មនុស្សយ៉ាងប្រាកដ ហើយនៅក្នុងរយៈពេលដ៏ខ្លីខាងមុខ ការឡើងកម្ដៅ និងបម្រែបម្រួលអាកាសធាតុភពផែនដីនឹងមានការឡើងជាងនេះទៅទៀត ។
ដោយ៖ ឈូក ស / White Lotus
ប្រភព៖ cool1007
No comments:
Post a Comment