ស្នេហាពេលខ្លះអាចកើតឡើងដោយមិនដឹងខ្លួន សូម្បីតែចាប់ចិត្តលើគេហើយក៏នៅមិនទាន់ច្បាស់លួចសួរខ្លួនឯងថា ពិតជាលួចស្រលាញ់គេមែនអត់ ហើយនេះជាស្នេហាមែនឬគ្រាន់ជាអ្វីផ្សេង ទើបបានជាមានអារម្មណ៍ចម្លែកៗបែបនេះ។ យ៉ាងណាក្ដី ខាងក្រោមនេះជាសញ្ញាខ្លះៗបង្ហាញថា អ្នកកំពុងមានចិត្តប្រតិព័ទ្ធ ធ្លាក់ក្នុងអន្លង់ស្នេហ៍លើគេហើយ៖
ចង់ដឹងពីគេស្ទើរគ្រប់រឿង
កញ្ញា សុភី អតីតសិស្សវិទ្យាល័យព្រះសីហនុ ខេត្តកំពង់ចាម ប្រាប់ថា បើមានអ្នកណាម្នាក់និយាយអ្វីពាក់ព័ន្ធនឹងគេ គឺចង់ស្ដាប់ចង់ដឹងខ្លាំងមែនទែន កុំថាឡើយរឿងធំដុំពាក់ព័ន្ធក្នុងជីវិតគេ សូម្បីរឿងតូចតាចក៏ចង់ដឹងដែរ។ ចង់ដឹងពីចំណង់ចំណូលចិត្តគេចូលចិត្តអី ស្អប់អី គេរៀននៅសាលាណា ពីមុនគេធ្លាប់ធ្វើអ្វីខ្លះ មានបងប្អូនប៉ុន្មាននាក់ គឺចង់ដឹងស្ទើរតែគ្រប់យ៉ាងឲ្យតែទាក់ទិននឹងគេ មិនថារឿងពីមុន បច្ចុប្បន្ន និងអនាគតនោះឡើយ។
រកនឹកថាត្រូវស្លៀកអី
ស្រីពេជ្រ អាយុ ២៥ ឆ្នាំ បុគ្គលិកធនាគារ ABA និយាយថា សញ្ញាសំគាល់មួយទៀត គឺចាប់ផ្ដើមចេះតុបតែងខ្លួនខុសប្លែកពីសព្វដង ថែមទាំងចំណាយពេលយូរដើម្បីគិតថ្ងៃនេះគួរស្លៀកសំលៀកបំពាក់មួយណាមើលទៅសម ហើយផ្អៀងផ្អងនៅមុខកញ្ចក់តែម្នាក់ឯងយូរម៉ោងទៀតផង។ បើពេលទៅណាមកណាដែលមានវត្តមានបុរសយើងដែលកំពុងមានកូនចិត្តលើ គឺខ្លួនយើងផ្ទាល់បារម្ភខ្លាចតែមើលទៅមិនស្អាត តែបើកន្លែងដែលគ្មានគេទៅទេ ទោះបីស្លៀកពាក់អីក៏មិនសូវខ្វល់ច្រើន។ នៅក្នុងចិត្តចេះតែចង់ធ្វើជាមនុស្សស្រស់ស្អាតសម្រាប់រូបគេ។
នឹកឃើញដល់រូបគេមុនគេ ព្រមទាំងចង់ចែករំលែកគ្រប់យ៉ាងជាមួយគេ
គ្រប់យ៉ាងនៅពេលដែលធ្វើអ្វីមួយមិនថា តែរឿងសប្បាយចិត្ត ឬកើតទុក្ខ គឺយើងចង់ប្រាប់ឲ្យគេបានដឹងជាងអ្នកណាៗទាំងអស់។ ចង់ឲ្យគេបានសើចរីករាយជាមួយពេលធ្វើអ្វីមួយល្អ មានស្នាដៃ។ ហើយនៅពេលជួបទុក្ខលំបាក ក្រៀមក្រំចិត្ត ក៏នៅតែចង់ឲ្យគេជាមនុស្សតែម្នាក់គត់ដែលដឹងមុនគេ លើកទឹកចិត្តយើង។ មួយវិញទៀត ពេលលេង FB បើឃើញគេកំពុង online យើងចង់ទៅ Chat ជាមួយគេភ្លាមៗ និយាយសួរសុខទុក្ខពីនេះពីនោះ។ លើសពីនេះ ប្រសិនចំថ្ងៃណាដែលគេខកខានមិនបានមករៀន ឬមិនបានជួបមុខគេដូចរាល់ដង ខ្លួនយើងផ្ទាល់មានអារម្មណ៍ថា ពិភពលោកនេះទទេស្អាត។ នេះបើតាមការឲ្យដឹងពី លោក ឧត្ដម បញ្ញា និស្សិតផ្នែកច្បាប់ កំពុងសិក្សានៅសាកលវិទ្យាល័យភូមិន្ទនីតិសាស្ត្រ និង វិទ្យាសាស្ត្រសេដ្ឋកិច្ច។
មានអារម្មណ៍ដូចចម្លែកៗ ឲ្យតែបានជួបមុខគេ
យុវជន ស៊ុន ជាណារ៉ា អាយុ ២០ ឆ្នាំ បានបញ្ចេញយោបល់ថា សញ្ញាមួយទៀតដែលបង្ហាញថា យើងកំពុងធ្លាក់ក្នុងអន្លង់ស្នេហ៍គេនោះ គឺភ័យខ្លាំងពេលដែលគេសម្លឹងភ្នែកចំ។ បើអ្នកផ្សេងមើលមក គឺមានអារម្មណ៍ធម្មតា ចំឡែកតែម្នាក់ហ្នឹង បើមើលមកយើងពេលណា គឺមានអារម្មណ៍ភ័យខ្លាំង ។ ហើយបើជួបមុខគេ រឿងដែលចង់និយាយទាំងប៉ុន្មានគឺភ្លេចអស់រលីង នឹកឃើញតែម្យ៉ាង គឺញញឹម និង សើច។
ចង់ឲ្យគេចាត់ទុកយើងសំខាន់ជាងគេ
ចំពោះ សុជាតា សិស្សថ្នាក់ទី ១០ នៃសាលាប៊ែលធី ប្រាប់ថា ចំណុចមួយទៀតដែលបង្ហាញថា ចាប់ចិត្តស្រលាញ់អ្នកណាម្នាក់ គឺការចង់បានយកចិត្តទុកដាក់ពីគេ។ វាជាអារម្មណ៍ដែលមានសេចក្ដីសុខខ្លាំងបំផុតពេលបាននិយាយជាមួយគេ។ហើយក៏មានអារម្មណ៍ខឹងនិងអន់ចិត្តខ្លាំងពេលគេមិនរវីរវល់ជាមួយ ឬទៅយកចិត្តអ្នកផ្សេងជំនួស។ បើពេលយើងជួបការលំបាក យើងចង់ឲ្យគេតែម្នាក់គត់ មកសួរនាំឬព្រួយបារម្ភពីយើង ត្រឹមនិយាយថា អ្នកមិនអីទេ? ក៏សុខក្នុងចិត្តដែរ។ ហើយបើគេមិនបានមកខ្វល់ខ្វាយពីយើង យើងមានអារម្មណ៍ថាខូចចិត្តជាខ្លាំង។
យ៉ាងណាហើយ មានអារម្មណ៍ថាពិតជាកំពុងធ្លាក់ក្នុងអន្លង់ស្នេហ៍គេមែនអត់?
ប្រភពៈ http://news.sabay.com.kh/
No comments:
Post a Comment